SI:SANG SI:DUGÉ NO
Tuniram Médok
Anu mé:lodlok kinné adísok
Si:sang si:dugé no.
Adi:é di:tum la:ma:nam
Kéréngé ré:tuu la:ma:nam,
Anu mé:lod gílodlok
Léngkan gíkanpéné no.
Aro bélamém kinsuma:né
Aíké arangílo lukermínsula
Amiém kangkurkosuné,
Réngamém ka:tín mé:tínsudopé
Gerlotko gerpéné no.
No silo orí:pé mínga:tok !
Réngam turlodém rotpagla
Aío:ké turnam mé:suné
Migang tosula pakíkíné bulu.
Nok si:sang a:ng pítanamlog
Íyi adíném kedyugla,
Nok tayengí:do renggabla
Lési-mésisula turdag bulu.
Aro bélamém kinsudaggom no
Atíko lusa:-gísang la:ma:dopé,
Bulugong kodo:pé kédopé
Appí:pé nom toryedla médag.
No kama:pé bulu
Atí ila:ma:namém anpa:sula
Mé:sukopé no lusa:-gísang la:ma:dopé,
Nok burné piyodém
Bulu rakodém kadrumla médag.
No,émmíl édémo:péi du:tíyen?
Nok si:sang si:dug a:nglog
Atí motum la:ma:nam
Moro:mo:tipé aíké mé:supé,
Atí pésoma:pé turpékodo
Péso pésola turpé mé:yok.
Doksiri দকচিৰি, মে, ২০২৬
No comments:
Post a Comment